This is meriduniya11 Header
Home>News  

 

 

 

 

 

Benazir Bhutto

Benazir Bhutto was born on 21 June 1953 in Karachi. She was the daughter of Zulfiqar Ali Bhutto, he was the founder of Pakistan Peoples Party. Benazir Bhutto was the former Prime Minister of Pakistan in 1988. Benazir was the first Woman in Islamic State, who selected for Prime Minister. Benazir Bhutto Assasination on 27 December 2007 in Rawalpindi. In this page you will read Benazir Bhutto Biography details in Urdu and Roman Urdu.

Benazir Bhutto Biography In Urdu

Benazir Bhutto Photo

Benazir Bhutto 21st june 1953 ko Karachi mein peyda hui. Aik raees aur taleem yafta gharane ke bache jis naz-o-naam mein parwan charhte hain, Benazir ko bhi yehi mahaul naseeb hua. Bad ki zindagi mein jo unhe dukh aur sadmey uthane parhe, qudrat shayad us ke awazz pehle unhe ziyada aram aur aasaiysh muhayya kar rahi thi. Unho ne oxford mein taleem hasil ki. Farigh ho kar watan tashreef lai, to wazarat-e-kharja mein aik desk par kharja amoor ka tajurbah hasil karne lagi. Siyasi duniya mein pehli baar unhe Shimla mein dekha gaya. Un dinon Bhutto sahab Ayyub Khan se naraz ho kar Clifton aae hue the. Bhutto Sahab ki wazarat-e-azma ke zamane tak Benazir ne khud ko doston aur kitabon tak mehdood rakha. Kabhi kabhi koi siyasi sawal le kar Bhutto Sahab ke pas pohanch jati aur agar un ke pas waqt hota to wo tafseel se jawab dene beth jate. Bhutto sahab ko jo baat kehne aur samjhane ka hunar hasil tha, wo bohat kam logon mein paya jata hai. Benazir ki khushqismati thi ke unhe Bhutto jaise baap aur ustaad mile. Khud Bhutto Sahab ne bhi yeh tey kar liya tha ke un ki siyasi Janasheen Benazir banegi. Isiliye unho ne apni beti ki siyasi taleem aur tarbiyat par khusoosi tawajja di.

5 July 1977 Benazir Bhutto ke liye araam-o-asaaiysh ki zindagi ka aakhri din tha. Iss ke baad unhein kabhi sukoon aur be fikri ke din naseeb na huye. Bhutto Sahab ki aseeri aur muqaddame ki karwaye, Begum Nusrat Bhutto aur Benazir Bhutto ki shab-o-roz ki masroofiyat ka mehwar ban gaye. Wo raat bhar beth kar Wakeelon ke sath case ki tayyari mein hissa leti, subha adalat jati aur jo baqi ka waqt milta, Dono Maa aur Beti car mein he Bhutto Sahab se milne jail mein jati aur berik ke pas ja kar he unhe car se utarne ka mauqa milta. Isi tarha wo mulaqat ke bad jail se bahar chali jati. in ki takleef aur aziyaton mein izafa hota chala gaya aur aakhir unhein wo azeem sadma bardasht karna parha, jis ke gehre asraat se wo kabhi nikal na sakein. Yeh sadma kisi bhi beti ke liye na qabil-e-tasawwur hota hai, ke us ke baap ko phansi ki saza de kar, raton raat kisi lawaris ki tarha dafna diya jaye aur use apne shaheed baap ka chehra dekhna bhi naseeb na ho. Yeh shahadat aur aakhri baar chehra na dekhna ka dukh Benazir ki nai shakhsiyat ki bunyaad bana.

Benazir Bhutto ki shokhi dekhte he dekhte khatam hoti chali gai aur wo aik ladki se mudabbir khatoon ban gai. Kae saal tak unhe ghar aur jail mein qaid kar ke rakha gaya. Begum Nusrat Bhutto ki bemari barhi to unhe mulk se bahar jane ki ijazat mili aur taqreeban 6 saal bad Benazir Bhutto April 1986 mein apne Watan wapis aai. Benazir Bhutto ki shadi 18 December 1987 mein Janab Asif Ali Zardari se huye jo ab President of Pakistan hain. 1988 mein Zia-ul-haq fizaai hadse mein jaan bahaq ho gae aur phir aam intekhabat ka aelaan hua. Jila watni ke daur mein Benazir Bhutto Peoples Party ke leaders ke zer-e-saya siyasat karti rahi. Lekin jab unho ne dekha ke yeh log dohri policy par chal rahe hai, aik taraf Benazir Bhutto se wafadari ki qasmein khate hain aur dosri taraf Zia-ul-haq se bhi rabtey mein rehte hain. Chunache unho ne bhi Indra Gandhi ki tarha apne walid ke tamam khud sar sathiyon ko farigh kar ke party ke auhdey naujawan karkunon ko de diye aur Bhutto Sahab ke sirf wohi sathi party mein reh gae, jinho ne Benazir ki qeyadat ko khuloos-e-dil se tasleem kar liya.

1988 ke intekhabat mein kamiyabi hasil kar ke Benazir Bhutto Islami duniya ki pehli khatoon Wazeer-e-Azam December 2, 1988 mein muntakhib hui. Wo sab se kam umar Wazeer-e-Azam bhi thin. Magar establishment ne unhe majboran bataur Wazeer-e-Azam tasleem kiya tha. Mauqa milte he unhe iqtedaar se alehdah kar diya gaya tha. Un par un ke shohar Asif Ali Zardari par muqaddamat ka tomaar bandh diya gay aur dono miyan biwi in muqaddamat ko bhugatne mein lage rahe. Asif Ali Zardari ko jail mein daal diya gaya.

1993 mein Nawaz Sharif hukoomat khatam hui aur Ghulam Ishaaq Khan ne Benazir se siyasi himayat mangi. Un ki pehli shart yeh thi ke Asif Zardari ko jail se nikal kar, nigran-e-kabeena mein wazeer banaya jae. Ghulam Ishaaq Khan ko majboran yeh shart tasleem kar ke Asif Ali Zardari ko wazeer banana parha. 1993 election mein People's Party ne phir kamiyabi hasil ki aur Benazir Bhutto dobara Mulk ki Wazeer-e-Azam ban gai, magar un ke khilaf sazishon ka silsila jari raha. 1996 mein unhe phir bartaraf kar ke Asif Zardari ko dobara jail mein dal diya gaya. Hulmaranon ka mansooba tha ke Benazir Bhutto ko bhi jail mein daal diya jae. Jis ki unhe barwaqt khabar ho gai. Un ke samne do he rastey the. Jail ja kar apne chote chote bachon aur party ko lawaris chor deti ya beyroon-e-mulk ja kar dono ki zimedariyan nibhati. Unho ne dosre rastey ka intekhab kiya. Pakistan mein Nawaz Sharif ki hukoomat to khatam ho gai, lekin Benazir ki jilawatni khatam na hui aur na he Asif Zardari ko rehaai mili. Parvez Musharraf ka pora daur iqtedaar Benazir ko jilawatni aur Asif Zardari ko jail mein guzarna parha.

2004 ke aakhir mein jab sare muqaddamat mein zamanat ho gai to Asif Ali Zardari ko jail se nijaat mili. Bad mein Parvez Musharraf se rabtey hue, Benazir Bhutto se kaha gaya ke wo intekhabat se pehle watan wapis na aae, lekin unho ne kisi ki na mani. Karachi mein 18, October 2007 ko pehle he kher maqdami juloos mein zabardast dhamaka huwa, tahum wo mehfooz rahi. Lekin 27 December 2007 ko Rawalpindi mein kiye jane wale hamley ne unhe jam-e-shahadat nosh karna parha aur unho ne bhi isi shehar mein jaan de di, jahan un ke walid ko phansi di gai thi.

Shaheed Benazir Bhutto ki shahadat par dost, dushman sab he ishkbaar the. Yateemi ki halat mein siyasat shuru kar ke, unho ne aik aesa maqam hasil kiya, jo kisi dosre leader ko naseeb nahi hua aur wo qaum ki leader ban chuki thin. Un ki shahadat ka soog pore Pakistan mein he nahi, bal ke duniya bhar mein manaya gaya. Qaumi aur aalmi satah par is qad-o-qamat ka leader Pakistan ko dobara kab naseeb ho ga ??? shayad iss ke liye kaye ashrey intezaar karna parhe ga.

 

More Links

 

Copy Right 2012-2014 www.Meriduniya11.com