Meriduniya11 Header
Home>Interview  

 

 

 

 

Shoaib Akhtar

Shoaib Akhtar was born on 13 August 1975 in Rawalpindi. He is known as Rawalpindi express. He started his cricket career on 29 November 1997 against West Indies in a test match. He started his one-day career in 1998 against Zimbabwe. Shoaib has played his last test match against India in 2007 and last ODI in 2011 against New Zealand. Here is an interview and information with Shoaib Akhtar, hope you will enjoy this interview in Urdu and Roman Hindi.

Shoaib Akhtar Information

Pakistani Cricketer Shoaib Akhtar Photo

13 August 1975 ko Rawalpindi mein paida hone wale Shoaib Akhtar ne apne benulqwami cricket career ke aghaz 29 November 1997 ko west Indies ke khilaf test kheel kar kiya, jab ke 8 December 2007 mein Bharat ke khilaf kheela jana wala match un ke cricket career ka akhiri test sabit howa. Wo apne aik roza benulaqwami career ka aghaz 28 March 1998 ko Zimbabwe ke khilaf karne mein kamyab rahe aur 8 March 2011 ko New Zealand ke khilaf kheela gaya match un ke aik roza benulaqwami career ka akhiri match ban gaya.

Rawalpindi Express ke naam se pukare jane wale Shoaib Akhtar 46 test matches mein 178, 163 aik roza benulaqwami matches mein 247 aur 15 T20 mein 19 wickets hasil karne ka record rakhte hain. Unhein 12 martaba test matches ke doran aur char martaba aik roza cricket mein 5 wickets hasil karne ke elawa test matches mein 2 martaba 10 wickets lene ka ezaz hasil hai. Un ki test cricket mein behtareen osat 11 runs de kar 6 wickets aur aik roza matches mein 16 runs de kar 6 wickets aur T20 mein 38 runs de kar 3 wickets hasil karna hai.

Sabiq cricketer Shoaib Akhtar 2002 mein Newzeland ke khilaf pheli martaba 161.3 kilo meter fi ghanta ki rafter se bowling karane mein kamyab rahe.unhon ne isi saal Sirilanka ke khilaf bhi teez tareen bowling karane ka ezaz hasil kiya . wo duniya e cricket ke phele bowler hain jo 100 meal fig hanta ki rafter se bowling karane ka record qaim karne mein kamyab rahe.duniya e cricket mein batsmanon ke leye dehshat ki alamat samjhe jane wale ghazabnak bowler ko go ke cricket ko kher bad kahe kuch saal ho chuke hain lekin wo aaj bhi cricket se mutaliq kiye jane wale tabsaron aur tajziyon ki roshani mein na sirf cricketers balke aam shaiqeen mein apni maqboliyat barqarar rakhe howae hain. Shoaib Akhtar jahan apne criket career mein shandar karkardagi ke zarye Pakistan cricket team ki fatohat mein aham kirdar ada karte rahe, wahan wo baz mamlat mein tanaziat ka shikar rahe. Jab ke un ke Usman Shanwari se mutaliq deye gaye haiya bayan mein jis mein unhon ne Misbah aur Hafeez ka bhi zikar kiya tha, Pakistan cricket mein hal chal machane ka bais ban gaya tha. Jis ke bad PCB ke qaim muqam chairman Najam Sethi ko aik press conference mein wazahat karne pari thi. Wo cricket chorne ke bad haliya saalon mein waqatan fa waqatan razakarana tor par nujawan bowlers ko bowling ke asrar o ramoz bhi sikhate rahe. Khas tor par fast bowlers Irfan aur Junaid ko bowling mazid behtar banane ke chutkale dete rehte hain. Un ka aik interview aap ki pesh e nazar hai.

Shoaib Akhtar Interview

Question: Aap duniya e cricket ke tez tareen bowler hain. Kia aap samajhte hain ke cricket ki khidmat ka jo khaka cricket chorte waqat aap ke zehan mein tha ab is ke mutabiq kaam kar rahe hain ya bahesiyat coach cricket ki khidmat ka jazba rakhte hain?

Shoaib Akhtar: Mujhe bahesiyat coach kisi job waghera ki zarorat nahi hai, main razakarana to rpar kaam kar raha hun jo koi bhi mujh se mashwara mange ga main zaror don ga, main nujawan khilariyon ko sikhane ka mawza nahi lena chahata. Agar koi 5 ya 10 lakh le kar coaching kare aur ese Pakistan ki khidmat ka naam de to main ese khidmat nahi samajhta, ab ye sab band hona chaheye. Cricket board mein ese log hain jo har kaam kar rahe hain, ese logon se mujhe sakhat nafrat hai. Haqiqat ye hai ke Pakistan ki team kamyabi hasil karti hai to mujhe bohat khusi hoti hai lekin jab harti hai to taqlef hoti hai, Pakistan mein cricket khelne walenujawan mere bhai hain, sab ke leye mere darwaze khole hain. Main khilariyon ko mashwara deta rehta hun, mujhe jab bhi muqa mila main ne Irfan aur Junaid ko takniki baatein batai hain, cricket ki duniya mein bara bowler banne ke leye infiradi zimedari apni salahiyaon mein nikhar lane ki zarorat hai. Warna koi bhi acha bowler, acha batsman, acha fielder nahi ban sakta.

Question: Aap ko cricket chore howae kai saal ho rahe hain, baz tanaziat bhi aap se mansob rahe hain, lekin duniya e cricket mein aap ki maqboliyat aaj bhi usi tarah barqarar hai is ka kia raaz hai?

Shoaib Akhtar: Main ne jab tak cricket kheli kabhi apni qoum ko mayos karne ki koshish nahi ki, is doran kabhi apni taklif ki bhi parwah nahi ki aur Pakistani team ki achi karkardagi aur fatah ke leye naqabil e bardasht taklif mein bhi imandari ke sath khelta raha. Is mein kitna kamyab raha ye logon ke piyar se pata chal sakta hai ke wo aaj bhi mujhe wohi ahmiyat aur hesiyat dete hain, meri soch aur koshish aaj bhi yehi hai ke oakistan ke leye kuch karon aur Pakistan ki izzat o waqar mein ezafe ka sabab banon.

Question: Junobi Africa ke khilaf Pakistan ki majmoi karkardagi ko samne rakhte howae Sirilanka ke khilaf jari series mein Pakistani team ki karkardagi ko kahan dekhte hain?

Shoaib Akhtar: Pakistani cricket team is waqat bowling ke hawale se duniya mein one day ki number one team hai, humari team ka problem hameeshah humari bating rahi hai. Bating mein agar Pakistani team ki performance kharab hai to is ki wajah ye hai ke humare kuch batsmanon ki taknik achi nahi hai jab ke kuch batsmanon mein sanjidgi ki kami hai, kuch ko malom hi nahi ke match ko kis tarah khatam karna hai, halanke larke bore nahi hain bohat ache hain. Umar Akmal kabhi kharab khelta hai aur kabhi acha kheel jata hai. Duniya ki dosri teams mein 19 saal ke larke centuryan banate hain. Humare larke 19 saal se khelte howae ab 23 saal ke ho gaye hain, lekin un ki aik century nahi hai. Is karkardagi se ye pata chalta hai ke humare batsmanon ki mantal growth ruk gai hai. Batsmanon ki is tarah ki sorat e hal dekh kar mujhe problem hoti hai ke aap itna khelne ke bawajod bhi bahesiyat bowler aur batsman improve kyun nahi kar pa rahe, agar improve karein ge to Pakistani team ko faidah ho ga.

Question: Humari team ke batsman khas tor par aksar uqat mushkilat mein himat har dete hain, akhir humare khelariyon ko kis tarah ki rahnumai ki zarorat hai ta ke is qism ki khamiyan dor hun aur batsman tamam halata mein behtar karkardagi ka muzahirah kar sakein?

Shoaib Akhtar: Pakistan team ko aik ache leader ki zarorat is mein shak nahi ke Misbah aik acha captain hai, aik acha leader sabit ho sakta hai. Misbah jab team mein nahi tha, main ne us ko us waqat bhi support kiya tha, main ab bhi ese support karta hun, main sirf ye chahata hunk e wo apni zaat se bahar nakal kar soche ta ke Pakistani team ko faidah ho 70 ya 80 runs score karne ke bawajod agar team har jaye to wo bekar hai, one down agar aap runs karte hain aur team kamyab hoti hai, main chahata hunk e Misbah fatah ke sath sath match finish ki salahiyat bhi paida kare.

Question: 2015 ke World cup mein aap Pakistani team ko kahan dekhte hain?
Shoaib Akhtar: Main World cup mein Pakistan ko top teen (3) teams mein dekh raha hun, sirf kheel se mutaliq tamam halat ko samajhne aur pressure ko handle karne ki baat hai, dileri se kheele to bohat kuch kar sakte hai.

Question: Kia aap samajhte hain ke humare khelariyon ko na sirf benulaqwami satah par balke domestic satah par bhi khelne ke bohat kam mawaqe mile hain. Cricket kam ho ne ki wajah se humari team aksar uqat nazuk mawaqe par bhi pressure bardasht nahi kar pati? Ye baat kis had tak durust hai?

Shoaib Akhtar: Yaqenan haliya saalon mein humari cricket ko bohat nuqsan howa, lekin sab se bara nuqsan ye hai ke Imran Khan ke bad Pakistan cricket team ko koi acha captain nahi mila,Imran Khan mein team ka pressure apne upper lene ki salahiyat thi, main yehi baat Misbah ko kehta hun ke wo team ka pressure apne upper le us mein esa karne ki salahiyat hai, agar wo esa amli tor par karne mein kamyab ho gaya to phir team khud bakhud kamyabi ke track par aajaye gi, jab Misbah ko World cup tak captain banaye jane ka elan howa to main ne use sab se ziyadah support kiya tha kyun ke World cup mein captain ke leye Misbah hi sahi intekhab hai, lekin mujhe problem us waqat aati hai jab akhiri lamhat mein Pakistan jite howe matches har jata hai.

Question: Kia Bharti team ke khelariyon ko IPL mein khelne ki wajah se karkardagi ko behtar banane ka muqa mila hai?

Shoaib Akhtar: mera khayal hai ke IPL ki wajah se to one day balke duniya ki cricket kharab hoi hai, T20 mein ziyadah dimagh ki zarorat to hoti nahi hai, wahan to sirf tuka laga ne ki baat hai. Meri nujawanon se bhi ye hi darkhuwast hai ke T20 ke nahi balke test cricket ke palyers banein, jitna pesa is waqat T20 par kharch kiya gaya hai agar is ke muqable mein adha pesa bhi test cricket par kharch kiya jaye to duniya ki cricket behtar ho jaye, Bhaarti cricket board jitna jaldi is haqiqat ko tasleem kar le ga itna hi duniya ki cricket ke leye behtar ho ga.

Question: Is waqat Pakistan team ke coach ki tabdetli ki baat ho rahi hai, aik acha aur qualified coach team ke leye kitna zarori hota hai?

Shoaib Akhtar: Is satah par aane ke bad kisi khelariya team ko coach ki koi zarorat nahi hoti, team ke leye aik achi management ki zarorat hoti hai. Team ko manager karne wala bandah chaheye jo khelariyon ki nafsiyat ko samajh kar un se piyar ke sath karakardagi hasil karne ki salahiyat rakhta ho, jo smart ho, jis ka dimagh kaam karta ho, jise cricket ke bare mein pori malomat hon, use pata ho ke Irfan ko 5 one day nahi khelane chaheyein, Irfan ki jo physic hai is lehaz se wo 5 one day ke bajaye teen one day kheel sakta hai. Irfan jese khelari ko 5 one day matches ke leye taiyari karai jaye aur teen aham one day khelaye jayein take is ko koi injury na hob aur is ka fitness level barqarar rahe. Zahir hai ke jab Irfan jesa bowler pori tarah fit ho ga to phir Pakistani team jeete gi.

Question: Kia aap is baat se itefaq karein ge ke aaj ke jaded dor mein khelariyon ko injury se mehfooz rakhne aur physical fitness baqarar rakhne ke leye aik ache trainer ki zarorat hai?

Shoaib Akhtar: Jahan tak injury aur physical fitness ki baat hai to phir duniya ke fast bowler jihon ne apne apne waqat mein apne aap ko benulaqwami satah ki matluba fitness level ko barqarar rakhte howae karkardagi pesh ki hai duniya ke fast bowlers ne, hum ne ya Waseem Akram jese bowlers ne apne dor mein in baton ka bohat khayal rakha hai aur duniya mein aik naam banaya, matches jitaye aur hamesha kheel ke doran tagre rahe hain, un se kaam liya jaye lekin ye kaam razakarana tor par ho pese ke ewaz nahi ta ke ache khelari behtareen karkardagi dene ke qabil ho sakein.

Question: Sharjeel, Usman Khan, Suheb Maqsood, Bilawal Bhatti ya Anwar Ali jese nujawan khelariyon ki Pakistan team mein jagah banane se mutaliq aap kiya kahein ge?

Shoaib Akhtar: Shajeel acha opener hai Nasir Jamsheed ne albata mayos kiya, halan ke Ahmed Shehazad aur Nasir mein bohat ziyadah talent hai, Asad Shafiq ko zaya kiya jar aha hai aur bhi ache khelri hain. Lekin jab tak kuch kar ke nahi den ge is waqat tak baat nahi bane gi. Agar khelari domastic mein kitni hi achi karkardagi pesh kar jayein lekin agar moqa milne par international cricket mein kuch na kar sakein to phir baat nahi banti. Humare batsman yahan jitney bhi runs kar len unhein international cricket mein runs karna hon ge, degar nujawan khelariyon ki karkardagi zaroor achi hai, lekin unhein karkardagi manwane aur sabit karne ke leye ibteda mein ziyadah mehnat ke sath karkardagi mein tasalsul barqarar rakhna ho ga, jab hi team mein jagah pakki ki ja sakti hai.

 

 

More Links

 

Copy Right 2012-2014 www.Meriduniya11.com