Header
Home>>Interview >  

 

 

 

 

 

Shamim Hilali

Shamim Hilali was born in Mumbai. After separation of Pakistan and India, Shamim Hilali moved to Lahore with my family. Shamim Hilali received degree of Masters in English Literature from Lahore. Shamim Hilali started her career from drama “ Alif Noon ”, it is her first play. Now Shamim Hilali performing very different role in new drama series “ Talkhiyan ”, it is based on reality. In this page you will find Pakistani actress Shamim Hilali Interview In Urdu and Roman Hindi.

Shamim Hilali Interview In Roman Urdu

Shamim Hilali Photo
Pakistan mein television ke nazreen ki dilchaspi ke liye tafreehi program pesh karne walon mein aik mutabar naam Shamim Hilali ka bhi hai,jo nehayat talented actress hain. Senior Actress Shamim hilali ka aik naya drama “ Talkhiyan ” jo ke samaj aur us ke baaz kirdaron par pesh kiya ja raha hai. Is drama mein apne kirdar se mutalliq Shamim Hilali se ap ki mulaqat ap ki khidmat mein pesh kar rahe hain.

Question : Shamim Hilali Sahiba apne barey mein kuch bataeye ?

Shamim Hilali : Main ne taqseem-e-hind se chand roz qabal Mumbai mein aankh kholi. Lekin jald he mere ghar wale hijrat kar ke Lahore aa gae. Is tarha mera bachpan Lahore mein guzra aur wahin taleem ke tamam madarij tey kiye. Main ne English Literature mein Masters kiya aur shoba-e-tadrees se wabasta rahi. Zamanae talib-e-ilmi mein mukhtalif saqafti sargarmiyon mein hissa lena shuru kiya aur bad mein TV par acting ka mauqa mila. Yeh safar aaj bhi jari hai aur ab nazreen mujhe “ Talkhiyan ” drama mein aik kkirdar nibhate hue dekhenge.

Question : Acting ki taraf kaise aana hua ?

Shamim Hilali : Hamare zamane mein school aur college ki satah par mukhtalif programs ka ineqaad kiya jata tha. Us daur mein adbi aur saqafti sargarmiyon ka ineqaad bohat aehmiyat rakhta tha aur un mein schools aur colleges ke talba barh charh kar hissa lete the. Singing, dance performance aur dramon ke ilawa ranga rang cultural shows ka ineqaad taleemi idaron ki mazoot riwayat tha. Tahum waqt ke sath sath sab kuch badal gaya. Lahore ke adbi aur saqafti mahaul ne mujhe bhi mutassir kiya aur main ne zamanae talib-e-ilmi mein college ki satah par programs mein hissa lena shuru kar dia. Us mein dramas bhi shamil the. Yun adakari ka shauq parwan charhta raha, college ke bad aik theatre group ke sath drama kiya, jise meri pehli baqaiyda performance keh sakte hain.

1964 mein PTV aya aur logon ki tawajja hasil kar li. Un dino TV ne University Magazine ke naam se aik program shuru kiya, jis mein talba ko madoo kiya jata aur un ki taleem aur rujhanat par baat cheet ki jati thi. Us mein shareek hone ka mauqa mila. PTV par us program mein shirkat aik naya aur khobsurat tajurbah tha. Wahan mujhe dramon mein kaam karne ko kaha gaya. Yeh aik mushkil baat thi, kyun ke us waqt sab kuch Live hota tha. Main ne inkaar kar diya aur kaha ke yeh main nahi kar sakti. Lekin qismat mein TV artist banna likha tha. To pehla play “ Alif Noon ” kiya, Kamal Ahmed Rizvi ki tehreer karda aik comedy series mein mujhe aik aesi taliba ka kirdar ada karne ka mauqa mila. Jo “ Alif Noon ” ki shop par apni Cycle thek karwane aati thi. Yun acting ka silsila chal nikla.

Question : Drama “ Talkhiyan ” is ke barey mein kuch bataeye ?

Shamim Hilali: Yeh mera naya drama hai, jis mein hamare muaashre ko Aurat ki aankh se dekha gaya hai. Yeh drama mashoor Novel “ The God Of Small Things ” se makhoz hai. Jise India se talluq rakhne wale Novel Nigar Arundhati Roy ne takhleeq kiya tha. Yeh nainsafi aur dukhon par mabni aesi kahani hai. Jis mein aurat ke roop ki akasi ki gai hai. Is mein har kirdar ki zindagi ki talkhiyon aur takleefon ko ujagar kiya gaya hai. Yeh aam dagar se hat kar aik kahani hai, jis bunt nehayat mazboot hai aur us mein kaam karne wale tamam fankaron ne apni mehnat aur salahiyat se apne kirdaron ko haqeeqat se qareeb tar diya hai.

Question : Apne kirdar ki tafsilaat bataeye ?

Shamim Hilali : Main is drama mein heroin ki maa ka kirdar ada kar rahi hoon. Jise sab Mama Ji ke naam se jante hain. Yeh aik aesi aurat ka kirdar hai, jo apne shohar ki bad mizaji aur sitam ka nishana banti hai. Lekin muashrey ki aam aurton ki tarha sab ke samne apni zindagi ki talkhiyon aur takaleef ka izhaar nahi karti. Bal ke apne shohar ke bure raiwaiyye ko jhelte hue, use dosron se chupane ki koshish karti hai.

Question : Apna kirdar samajhne aur use apnane mein kitna time laga ?

Shamim Hilali : Dekhiye, aik ache kirdar ki khobi yehi hai ke wo apne drama ke character mein mukammal taur par dhal jae aur use apne oper tari kar le. Isi sorat mein wo kamiyabi hasil kar sakta hai. Hamare han aurton ke sath is qisam ka rawaiyya aam baat hai. Jab ke wo sab kuch khamoshi se bardasht karti hai. Mujhe yeh kirdar haqeeqat se bohat qareeb maloom hua. Yehi wajah hai ke use apnane mein koi mushkil pesh nahi aai.

Question : Mama Ji ka kirdar ap ke mazi ke kirdaron se kis tarha mukhtalif hai ?

Shamim Hilali: Yeh mere career ka jandaar character hai. Mujhe is qisam ka role nibhane ka mauqa nahi mila. Aik Maa aur Biwi ki hesiyat se munfarid performance dene ka yeh pehla tajurbah hi. Yeh har lihaz se mukhtalif aur munfarid hai. Jab ke is serial ki mazboot kahani bhi mere liye yadgaar sabit hogi.

Question : Apne paristaron k liye koi peygham dena chahengi ?

Shamim Hilali: Main kahongi ke drama Talkhiyan zaroor dekhen. Yeh aik munfarid aur shandaar drama sabit ho ga aur aap use zaroor pasand karenge. Jahan tak is drama mein mere kirdar ki baat hai to hamesha ki tarha main ne apne madahon ka dil jeetne aur umdah performance dene ki koshish ki hai. Umeed karti hoon ke mera kirdar ap ko pasand aaega.

More Links

 

More Links
Akshay Kumar
Sonakashi Sinha
Ali Zafar
Nida Yasir
Amina Sheikh
Naseem Hameed
Bushra Ansari
Ahsan Khan

 

Copy Right 2012-2013 www.Meriduniya11.com Contact Us