Header
Home>Interview  

 

 

 

 

Sajal Ali

Sajal Ali is born on 17 January 1994 in Lahore. It is not a long time that she enters in drama industry but from her performance, she not only gets place in viewer’s heart but she is also being a favorite Pakistani actress for all drama directors. She is a very professional actress. Sajal has acted in many dramas some of these are "Mastana Mahi", “Ahmed Habi ki betiyan", "Saas Chali Sasural", "Meri ladli", "Chandni", "Nanhi" aur "aasmano pe likha hai." Here we are presenting an interview with Sajal Ali for you In Urdu and Roman Urdu.

Sajal Ali Interview In Urdu

Sajal Ali Photo

Sajal Ali ko qudrat ne bari faiyazi ke sath husan se nawaza hai. Is leye unhein pheli bari dekhne wala ye soch kar heran reh jata hai ke in jheel si gehri ankhon ki tarif kare, dilkash muskurahat ko dil mein utare, khando khal ki nazakat ko sarahe ya chere ki masomiyat par fida ho jaye. Yehi nahi balke un ki to awaz mein bhi is qadar naghmagi hai ke jese kanon mein ras ghol jaye. In sab se barh kar Sajal ki bemisal adakarana salahiyatein hain ke jin ke sabab wo beshumar dilon mein basti hain. Isi leye kaha jata hai ke husn o zahanat kisi aurat mein yakja ho jayein to wo bila shuba logon ke dilon par hukumat kar sakti hai. Sajal ka shumar un gini chuni adakaraon mein hota hai jo apni salahiyaon ki bina par adakari ke medan mein aate hi aik alag pehchan qaim kar leti hain. Drama industry mein qadam rakhe unhein chand saal se ziyadah arsa nahi guzra lekin apni mazbot performance ki badolat unhon ne abteda hi mein nazreen ke sath sath drama directors ko bhi apna madah bana leya. Ye hi wajah hai ke aaj wo media ki pasandedah tareen adakaraon mein se aik hain. Aaj kal Geo TV par dekhaya jane wala drama serial "asmanon pe likha hai" bohat ziyadah maqboliyat hasil kar raha hai aur ese Pakistan TV ki tarikh ka sab se kamyab serial qarar deya ja raha hai. Sajal is mein Qudasiya ka role bari khobi se ada kar rahi hain. Aaj ku maqbol tareen TV Actress Sajal Ali se un ke maqbol tareen drama serial "asmanon pe likha hai" aur un ki dilchaspiyon ke bare mein ki
gai goftogu aap ki nazar hai.

Question: Aap ki tarikh e paidaish?

Sajal Ali: "Main 17 January 1994 ko Lahore mein paida hoi." Sajal ne jawaban kaha. Is lehaz se un ka taluq burj e Jadi se hai, aur baqol Sajal ke un mein is burj ki ziyadah tar khososiyat hain. Yani wo pur azam hain, mushkil manzilon ko sar karne ka hosla dil mein rakhti hain aur apne khuwabon ko tamil dena chahati hain.

Question: Adakari ki janib kese aayein?

Sajal Ali: Phele se kuch te nahi kiya tha lekin chunke hota wohi hai jo asmanon pe likha ho. Is leye ghomne phirne Karachi aai aur ye sun kar ke aik drama serial ke leye auditions ho rahe hain, shoq shoq mein audition dene pohanch gai aur is mein kamyab bhi ho gai.

Is ke bad Sajal ne bohat se serials mein kaam kiya jin mein "mastana mahi" " Ahmed Habi ki betiyan" "sas chali susral" "meri ladli" "chandni" "nanhi" aur "asmanon pe likha hai" numayan hain. Khas baat ye hai ke Sajal ne ibteda hi se tamam dramon mein markazi kirdar hi ada kiye. Un ka kehna hai ke ye un ki kush qismati hai ke jo bhi role milta hai wo phele se behtar hota hai. Lekin "asmanon pe likha" un ka pasandidah tareen drama hai.

Question: Kis qism ke kirdar ziyadah pasand hain?

Sajal Ali: Yun to main ne har tarah ke kirdar kiye hai jin mein modren se le kar romantic aur manfi kirdar tak sab hi shamil hain. Lekin mujhe ese kirdar ada karne mein ziyadah lutf ata hai jin mein ahsasat aur jazbaat ki tarjumai karne ka ziyadah moqa mile. Unhon ne bataya ke Qudsiya ka kirdar unhein is leye ziyadah pasand hai ke is mein jazbaat ki akasi karne ke bohat se mawaqe hain.

Question: Aap ki kamyabi aur is qadar maqboliyat ka raz kia hai?

Sajal Ali: Is ki ye hi wajah hai ke adakari mera shoq hi nahi mera junon hai aur main job hi kirdar karti hun mujhe us se piyar ho jata hai. To jab koi kirdar mein is qadar dob jaye to phir use pasand kiya jana yaqini hai.

Question: Apni kon si khobi sab se ziyadah pasand hai?

Sajal Ali: Main thori si khud parast hun, is leye apni shakal o sorat bohat pasand hai. bohat se log mere bare mein kehte hain ke jheel si aankhein, roop hai komal, naam hai us ka Sajal. Is ke elawa meri adat hai ke har aik ke kaam aane ke leye foran taiyar ho jati hun.

Question: Koi khas khami bhi ho gi?

Sajal Ali: Han, kyun nahi. Mujhe ghusa bohat jald aajata hai aur meri khuwahish hai ke main apne ghuse par control karna sekh jaon.

Question: Agar adakara na hoten to kia hoten?

Sajal Ali: Agar adakara na hoti to phir yaqinan siyastdan hoti. Kyun ke siyasatdan bhi kisi adakar se kam nahi hota.

Question: Kis qism ke log pasand nahi hain?

Sajal Ali: Wese to main achi dost aur raazdan hun lekin ese manafiq qism ke log mujhe bilkul pasand nahi jo kehte kuch aur hain aur karte kuch aur hain. Ese afrad ko bardasht karna mushkil hota hai jo dohra mayar rakhte hain.

Question: Zindagi ki sab se behtareen tarif jo aap ke dil ko cho gai ho?

Sajal Ali: Mera phela seen dekh kar Fahad Mustufa ne kaha tha ke wo meri adakari dekh kar heran reh gaye ke koi nai larki itni achi adakari kese kar sakti hai. is leye aik nai adakara ki hesiyat s us waqat Fahad Mustufa ke ye alfaz mere leye bohat qimati the.

Question: Ye bataye ke phele seen par jis ke leye aap ki itni tarif hoi, aap ne itne retake deye?

Sajal Ali: Ye hi to baat hai ke phele hi take mein seen OK ho gaya tha. Aur main aap ko bataon ke mere retakes bohat kam hote hain kyun ke main script bohat achi tarah parhti hun aur ghar se rehearsal kar ke set par aati hun.

Question: Salgirah kese manati hain?

Sajal Ali: Salgiraj manati hun lekin bohat ziyadah dhom dham nahi karti, bas walden aur behan bhai ke humrah cake waghairah kat leti hun aur phir acha sa khana khane chale jate hain.

Question: Family ke bare mein kuch batayen?

Sajal Ali: mujhe apni family se bohat muhabat hai. meri waldah bhi adakari ka shoq rakhti hain aur stage ke aki dramon mein adakari bhi kar chuki hain, Sajal unhi se adakari ki barikyan sekhti hain. Walid businessman hain. 2 behan bahi hain, jo in se chote hain. Behan Sanobar bhi adakari ke medan mein qadam rakh chuki hain aur Sajal ki manind adakari ke shobe mein naam banane ki khuwahish rakhti hain.

Question: Mustaqbil ke kia plans hain?

Sajal Ali: Ahi to safar ka aghaz howa hai aur abhi to bohat aage jana hai. is moqe par unhon ne apni maqbol tareen drama ki theme dohrate howa kaha ke “ unsiyat se chahat ke safar mein job hi mushkilat aaein, taqdir ka likha har azmaish par pora utarta hai.”

Question: Aap ki pasandedah shakhsiyat kon hai?

Sajal Ali: Meri mama duniya mein meri pasandedah shkahsiyat hain aur main un se hi sab s ziyadah qareeb hun.

Question: Aap ke pasandedah mashaghil?

Sajal Ali: Mere pas itna waqat nahi hota ke kisi mashghale ko apnaon aur usse baqidah waqat don, is leye mujhe job hi waqat milta hai apni family aur khas tor se mama ke sath guzarna pasand karti hun.

Question: Ghomne phirne ka shoq hai?

Sajal Ali: Ji han bilkul. Mujhe saiyahat ka bohat shoq hai, aur ghomne ke leye Dubai meri dil pasand jagah hai.

Question: Aap ki pasandedah adakara jin ki adakari se aap mutasir hun?

Sajal Ali: Sania Saeed meri pasandedah adakara hain. Un ki adakari ke andaz se main bohat mutasir hun aur chahati hunk e unhi ki tarah pehchani jaon. Is ke elawa pasandedah adakaron mein Moin Akhtar, Qavi Khan, Fawad Khan aur Salman Khan un ke pasandedah adakar hain.

Question: Aap ka pasandedah TV show kon sa hai?

Sajal Ali: Koi bhi nahi.

Question: Agar Bollywood ya apne mulk se kisi film ki peshkash hoi to is mein adakari karna pasand karen gi?

Sajal Ali: han kyun nahi. Agar fil ka script acha ho aur team bhi achi hoi to main film mein zaror kaam karon gi lekin Pakistan mein aaj kal filmein kahan ban rahi hain.

Question: Kon si film pasandedah hai?

Sajal Ali: Main films bohat kam dekhti hun, lekin jo films ab tak dekhi hain un mein se “Black” meri pasandedah hai.

Question: Kesa music sunti hain aur pasandedah golokar kon hai?

Sajal Ali: Mujhe mosiqi se bohat lagao hai. halki pholki mosiqi ke elawa ghazalen bhi bohat pasand hain. Mere pasandedah singers Rahat Fatah Ali Khan, Sherya Ghoshal aur Kishor Kumar hain. Un ka kehna hai ke wo mustaqbil mein golokari ka iradah bhi rakhti hain aur jald hi wo apna album bhi record karayen gi.

Question: Parhne walon ke naam koi pegham dena chahen gi?

Sajal Ali: Hamesha sabit qadam rahen aur apne khuwabon ko har sorat takmeel den aur kisi se bhi na daren. Agar aap mazbot rahein to koi bhi aap ka rasta nahi rok sakta. Apne baron aur khas tor se apne waldeen ki izat karein lekin is ke sath sath mujhe bhi support karte rahein.

 

 

 

 

More Links

 

Copy Right 2012-2014 www.Meriduniya11.com