header
Home>>Interview  

 

 

 

Ahsan Khan

Ahsan Khan was born on 9 October 1981 . He is a wonderful and famous artist. In Past, he worked in the Lollywood film industry. Still he is working in the film but little bit. Now he is working in 2 films, “ Ishq Khuda ” and “ Saltanat ”. He is working in the dramas. He is very talented and nice actor. He is a Super Star of Television. He is sincere and simple Man. He is very innocent. In this page you will read Pakistani actor Ahsan Khan Interview in Urdu and Roman Urdu.

Ahsan Khan Banner

Ahsan Khan Interview

Pakistani Tv actor Ahsan Khan Photo

Film ke jin fankaron ne Television mein aane ke baad nai zindagi paai un mein aik naam Ahsan Khan ka bhi hai. jise bohat achi filmon mein kaam karne ke bawajood woh pazeerai na mil saki jis ka wo haqdaar tha. tab Mohammed Javed Fazil ne Ahsan ko TV par mutaradif karaya, us ke bad Ahsan ne piche murh kar nahi dekha aur aj woh Television ka super star mana jata hai. us ke credit par beshumar hit serials, soap aur tele films shamil hai. betahasha shohrat aur maqbooliyat hasil karne ke bawajood us ke rakh rakhao aur tareeqon main koi farq nahi aya. wo bohat muhazzib aur shaista shakhsiyat ka maalik hai. is Page par apki Ahsan Khan se mulaqat karwai ja rahi hai.

Question : Aap ne jin dino showbiz join kiya,us waqt ye aik gher mustehkam program tha phir kiya soch kar is taraf chale aae?

Ahsan Khan : Mein film star banna chahta tha. us waqt film industry urooj par thi aur logon mein film star banne ka craze tha. main bhi maqbooliyat aur shohrat hasil karna chahta tha. khushqismati se mujhe ache mawaqey mile, meri filmon ne us daur mein platinium jublee ki,magar shayad mujhe woh raas na aai. filmon ki kamiyabi ke bawajood mujhe industry mein maqam na mil saka aur bahesiyat actor woh kamiyabi na hasil kar saka. jis ka mein ne khuwab dekha tha. Wese bhi wahan professionalism khatam hota ja raha tha. Mian in halaat mein khud bhi bad dil ho gaya tha lekin himmat nahi haari aur TV par kaam shuru kar diya,jahan mujhe kamiyabi naseeb hui.

Question : Kiya apko is kamiyabi ki tawwaqa thi?

Ahsan Khan : Main hamesha har faisla bohat aetemad se karta hoon. Film mein jane ka faisla bhi bohat yaqeen aur aetemad se kiya tha aur mujhe kamiyabi bhi mili. Main ne hit filmen di magar wahan qismat mere sath na thi. Phir jab TV ki taraf aya to mera confidence level wohi tha. Mujhe apni mehnat aur salahiyaton par bharosa tha. Main ne apna kaam pore aetemad aur yaqeen ke sath shuru kiya. Mujhe kamiyabi ki umeed zaroor thi magar itni ziada nahi, jitna acha response aur jitne ache mawaqe mujhe mile. Woh meri tawwaqa se kae ziada hai. Apne malik ka shukar guzaar hoon aur madahon ka hi shukriya ada karna chahonga, jinho ne mujhe pasand kiya aur kamiyabi ki is manzil tak pohnchaya.

Question : Agar filmon mein kaam kar rahe hote to kiya tab bhi itni shohrat aur ye maqam hasil kar sakte the?

Ahsan Khan: Silver screen ki baat he aur hai magar hamare haan is ka charm khatam ho chuka hai aur log khud use apne hathon se tabah kar chuke hai. Warna dunya bhar mein ab bhi cinema ko bohat maqbooliyat hasil hai. Is haqeeqat ko bhi nazar andaaz nahi kiya ja sakta ke TV jo maqbooliyat ataa karta hai wo film se nahi milti,qk Tv ghar ghar dekha jata hai aur us mein kaam karne wale bohat jald apni pehchan bana lete hai. Wese bhi ab to saal mein do ek he filmen achi banti hai. Lihaza logon ki sari dilchaspiyan TV screen tak mehdood ho chuki hai. Tv par kaam karne ka matlab ye hai ke ap ko lakhon caroron log dekh rahe hai aur ap ke kaam par tareef ya tanqeed kar rahe hai. Is lehaz se ye bohat he mazboot pehchan hai. Is tarha TV par kaam kar ke jo maqbooliyat mein ne hasil ki wo film se nahi mil sakti thi.

Question : TV aur film ke kaam mein kiya mehsoos kiya?

Ahsan Khan: Tv zindagi se qareeb hai. Us mein hamein apni zindagi ka aks nazar ata hai. Drama banate hue hum is ke tamam pehloun par nazar rakhte hai ke kahin bhi kuch aesa na ho jise logon ka zehan tasleem na karen aur wo unhe banawti mehsoos ho. Jab ke film mein numaishi lawazmat lazmi hote hai aur us mein janbooj kar masala dala jata hai. Bohat si gher mantaqi aur banawti baten hoti hai magar wo film mein buri nahi lagti, balke log unhe enjoy karte hai. Lehaza jab mein film kar raha tha to khud bhi us ke tamam lawazmat ko enjoy karta tha aur samajhta tha ke log use dekh kar khush honge. Jab ke TV par kaam kiya to hamesha aesa laga ke jo kuch hum kar rahe hai logon ko us mein apna aks nazar aaega ya nahi aur ye kaam rooh ki gehrai aur apne andar ki sachai ke sath hota hai. Ap ko sirf apna maal nahi bechna balke use ek aaiyne ki tarha logon ke samne lana hota hai aur TV ke kaam mein mujhe ziada maqsadiyat nazar aai. Kabhi kisi qirdar ko karte hue ye nahi laga ke jo kuch mein kar raha hoon wo hamari zindagi main nahi hota balke hamesha yun mehsoos hua ke apne muaashrey ki kisi tasveer ko samne la raha hoon. TV ke drame aur kirdar hamari apni zindagi ka aks hote hai, isi liya unhe karte hue ek taskeen ka ehsaas hota hai. Sab se barh kar TV aur film mein jo numayan farq hai wo professionalism ka hai. Film mein non-professionalism itni ziada hai ke use dekh kar mujhe zehni azyat hoti thi. Jab ke TV main professionalism maujood hai aur is par amal bhi kiya jata hai.

Question : App ne abhi kaha ke zindagi mein har kaam aetemad se kiya lekin film mein nakaam rehne ki ek wajah qismat ka sath na dena bhi hai to phir aj ki tamam kamiyabiyon ko kis ki deyn kahenge, taqdeer, halaat, ittefaq ya apki mehnat?

Ahsan Khan: Main ne ye maqm barson ki mehnat ke bad hasil kiya hai. Is ke ilawa qismat ne bhi sath diya warna aage bharna mushkil ho jata. Main ne bachpan se sirf yehi khuwab dekha tha ke ek din actor banoga aur apne is khuwab ki tabeer ke liye bohat koshish ki tab is maqam tak pohncha hoon. Is liye meri tamam kamiyabiyan, mehnat aur qismat ki marhoon-e-mannat hai.

Question : App ne hamesha sanjeeda kirdar kiye, change lena acha nahi lagta?

Ahsan Khan: Main ne change liya hai aur light comedy ke ilawa manfi kirdar bhi ada kiye hai, magar log mujhe positive aur sanjeeda kirdar mein dekhna chahte hai. Mere wohi serials popular hue hai jin mein sanjeeda kirdar nibhaya hai. Lehaza mein ase he kirdaron ko tarjeeh deta hoon, in par performance ki ziada gunjaish hoti hai.

Question : Negative kirdaron par kaisa response mila?

Ahsan Khan: In mein bhi meri performance bohat pasand ki gai. Hum TV se pesh kiya jane wala serial “pani jesa pyar” mein mera negative kirdar tha jo kafi maqbool hua magar mere qareebi logon aur madahon ne kaha ke mujhe aese kirdar nahi karne chahiye, wo mujhe aese roop mein nahi dekhna chahte. Wese bahesiyat fankar main zaati taur par is ke haq mein hoon ke mujhe har tarha ke kirdar karne chahiye. Kyun ke fankar ka kaam muaashrey ke haqeeqi kirdar ko samne lana hai aur is tarha ke manfi kirdar hamare ird gird maujood hote hai. To phir hum kyun na unhe portrey karen aur phir wo hamari apni shakhsiyat nahi hoti sirf ek kirdar hota hai. Logon ko jazbati nahi hona chahiye aur kirdar ko sirf kirdar ki had tak lena chahiye.

Question : Pichle chand saalon mein ap ne TV screen ko kae hit serial diye. Daastan, Parsa, Pani jesa pyar, Muthe bhar chawal, Saeyqa, Kahe ko biyahe bides, Take ki aaegi barat, Mere qatil mere dildar, Mere charagar. Agar dekha jae to in sab mein apk ek jese kirdar the. Apko performance ke aetebar se in mein se sabse ache serial kon si lagti hai?

Ahsan Khan: Ye sab meri pasandeeda serials hai. In sab mein mere kirdar ek jese zaroor hai, magar kahani aur halaat-o-waqeaatke aitebar se bohat farq hai aur main ne is farq ko samajh kar in mein variety dene ki koshish ki hai. Lekin agar ap kisi ek ka naam lene ko kahengi to main mushkil mein parh jaonga, phir bhi Daastan, Parsa, Pani jesa pyar, Muthe bhar chawal, Saeyqa, Mere qatil mere dildar aur Mere charagar mujhe ziada pasand hai. Kyun ke in dramon ko logon mein bhi maqbooliyat hasil hui hai aur ye serials kahani aur direction ke hisab se umdah thi.

Question : Farz karen film industy ko phir se urooj hasil ho jae to wapis jaoge?
Ahsan : Film mera pehla khuwab hai agar halaat behtar ho jae to zaroor jaonga magar bohat planning ke sath, ache kirdar, ache script aur ache director ko tarjeeh donga. Wese ab kuch ache films banna shuru hui hai. Maslan “Raamchand Pakistani”, “Khuda ke liye” aur “Bol” waghera. Agar is tarha ki filmen banti rahi to mujhe umeed hai ke hamara purana daur laut aaega.

Question : App ke khayal mein mazkura bala filmon ki kamiyabi ke kiya asbaab the?

Ahsan Khan: Sab se bunyadi wajah ye thi ke use banane wale professional log the, wo sahi maeyno mein takhleeq-kaar hai. Jinho ne uski sari juzyaat ka khayal rakha. Script, direction, acting aur camera work ke ilawa technique ka kaam bhi lajawab tha, in filmon ka homework pori tarha kiya gaya tha aur behtreen planning ke sath kaam kiya gaya. Un filmon ko sirf business samajh kar paisa banane ki koshish na ki gai. Jis ki wajah se pehle hamari industry tabah hui, kyun ke yahan non-professional log aa gae the aur unho ne is takhleeqi kaam ko business samajh kar apne bank balance mein izafa karna chaha. Kuch shauqeen aur daulatmand afraad sirf fankaron se dostiyan karne, un ke sath uthne bethne aur shohrat hasil karne ke liye producer ban bethe, jinhe film making ki ABC bhi nahi aati thi. Wo director ko apne ishare par chalane lage aur yun rafta rafta hamari industry tabah ho gai. Magar ab jo chand log kaam kar rahe hai. Wo takhleeq-kaar hai aur unho ne is ka amli saboot bhi pesh kiya.

Question : Hamare han filmon mein nach gana lazmi hai, is ke bagher film ka tassawur nahi. Apne jab filmon mein kaam kiya to lazmi taur par dance aur gane picturize karae honge, kaisa lagta tha?

Ahsan Khan: Filmon mein gane picturize karane ka apna ek maza hai, aur mujhe to bohat acha lagta tha. Zahir hai ke jab filmon mein kaam karonga to dance aur gane to karne he honge. Ye to mujhe pehle se maloom tha. Is liye kabhi bura na laga aur main ne us se hamesha enjoy kiya.

Question : TV par aap ke serials ki tadad bohot taweel hai, kiya ab bhi isi tarha aap kaam karna chahenge?

Ahsan Khan: Ye thek hai ke main ne kafi kaam kiya magar ap ko is mein bharti ka kaam bilkul nazar nahi aaega. TV par shuru se he main ne ache kirdar kiye aur kabhi sirf masroof rehne ke liye kaam nahi kiya. Ab ye meri zimedari hai ke mohtaat ho kar kaam karon ta ke mere image ko nuqsan na pohnche. Offers to hoti rehti hai, magar soch samajh kar ache script par kaam karna chahta hoon. Meri new filmen jo hai, “ Ishq Khuda ” aur “ Saltanat ” bohat ache filmen hai aur maine in filmon mein bohat mehnat bhi ki hai. Ab ye dekhne wale he is baat ko wazeh tor par bata sakte hai ke ye filmen kaisi hai aur mera kaam kesa hai is mein. Mujhe umeed hai ke meri in filmon par mujhe acha response milega jitni main ne mehnat se aur dil laga ke kaam kiya hai, utni he umeed hai ke logo ko pasand aaengi. Aur meri dil se pori yehi koshish hoti hai ke main aesa kaam karon jo sab ko pasand aae aur mere kaam ko dekh kar mutassir ho.

Question: In dino Film aur TV per aap ki kiya masrofiyat hai?

Ahsan Khan: Tv per "Mere Qatil Mere Dildar", Meri Ladli, Aini Ki Aayegi Barat, Iman aur Bilqees Koan, mein kaam kar raha hon jab ke naye do filmein "Ishq Khuda" (Hidayat Kar Shahzad Rafiq) aur saltanat (hidayat kar Faisal Bukhari) zair taqmeel hai.

More Links

 

 

 

 

Copy Right 2012-2015 www.Meriduniya11.com Contact Us