Header
Home>Entertainment  

 

 

 

Shabnam and Robin Ghosh

Shabnam was a Pakistani film actress worked in the lollywood film Industry. Her Husband is a Great Musician,Robin Ghosh. Shabnam has only one Son,his name is Rony. He lives in London. Shabnam was very talented and successful actress. Shabnam and Nadeem was a Golden Couple. Her film is Bandagi with Waheed Murad in 1972 was very Famous. Her last film is "Amma Jaan" in Bangali, It is very successful in Box Office.

Shabnam & Robin Ghosh In Urdu

Shabnam and Robinghosh Photo

Maazi ki maqbool adakara aur un ke mausiqaar shohar Robin Ghosh ki Pakistan aamad. Un ke paristaron ke liye taza hawa ka khushgawar jhaunka sabit hui. Is daurey ka aehtemam Pakisyan Television ne kiya tha. Apne qayam ke dauran Shabnam aur Robin Ghosh ne PTV ke program Subhe Nau mein shirkat ki thi. Karachi mein Governer Sindh Ishrat-ul-Ibad sahab se mulaqat ki aur adakar Lehri ke ghar gae. Lahore mein unho ne ek yadgaar taqreeb mein shirkat ki jis mein unhe Hukoomat-e-Pakistan ki janib se Life Achievement Award diya gaya.

Pakistan Television ne ek khusoosi show record kiya jis mein Robin Ghosh ki Mauseeqi mein mukhtalif singers ke naghme pesh kiye gae. Adakar Shabnam aur Robin Ghosh Pakistan mein apne be-misaal kher maqdam se bohat mutassir hue aur unho ne mutadid mawaqe par is ka izhaar kiya. Is daurey ke hawale se ek report pesh-e-khidmat hai.

Shabnam Ka Subh e Nau Mein Shirkat

Maurkha 24 April 2012, ko maazi ki mashoor film star Shabnam ne PTV News ke live program Subhe Nau mein khusoosi tor par shirkat ki. Un ke shohar naamwar mausiqar Robin Ghosh aur adakar munawwar Saeed bhi is program mein shareek the. Is mauqe par film star Shabnam ne kaha ke mein PTV ki tah-e-dil se mashkoor hoon ke unho ne bohat he mohabbat se Pakistan aane aur PTV ke programmon mein shirkat ke liye madoou kiya. Mujhe Pakistan aane par behad khushi hui hai. Is program ke dauran Pakistan ki mashoor filmi shakhsiyat ki live calls bhi aai,jin mein Ghulam Muhi-uddin, Mustafa Qureshi, adakara aur hidayatkara Sangeeta, film saaz-o-hidayatkaar Parvez Malik ki aehliya Shahina waghera shamil hai.

Is ke ilawa video message ke zariye film star Nadeem , Pop singer Aalamgir aur Zohaib Hasan ke peghamaat nashar kiye gae. In tamam hazraat ne film star Shabnam ko pakistan aane par khushaamdid kaha aur PTV ka shukriya ada kiya ke unho ne shabnam ko bula kar awaam ki ek bohat barhi khuwahish pori ki hai. Is live program mein film star shabnam ke mukhtalif mashoor filmi naghmon ke chote chote tukre bhi dikhae gae jise dekh kar wo bohat khush hui. Us ke ilawa naamwar mauseeqar Robin Ghosh ke mashoor gaano ki jhalkiyan bhi dekhai gae. Is program ko producer Gulzar Fatima ne barhi mehnat se pesh kiya. Jab Nusrat Haris ne barhe khoobsurat andaaz mein compairing ke faraiz anjaam diye. Is tarha ye program taqreeban 3 ghante tak jaari raha.

Aakhir mein Genral Manager Mustafa Kamal Mandokhel, Executive Program Manager Zartaaj Ali, Head of current affairs Rukhsana Lotiya aur Producer Gulzar Fatima ne film star Shabnam, Robin Ghosh aur Munawwar Saeed ka shukriya adaa kiya. Is tarha ye program Habib Wali Mohammed ke mashoor gane Aj Jane Ki Zid Na Karo, Yun He Pehlu Mein Bethe Raho, par ikhtetam pazeer hua.

Lifetime Achievement Award

Pakistan ke daurey par aai hui maazi ki adakara Shabnam aur unke shohar mauseeqar Robin Ghosh ko unki fanni khidmat ke silsile mein Lifetime Achievement Award diya gaya. Sabiq Wazeer-e-Aazam Yousuf Raza Geelani ne ek pur waqar taqreebmein in dono shakhsiyat ko ye award diya. Is mauqe par unho ne Shabnam ki Bangladesh rawangi ko pakistani filmi sanat ke liye ek barha nuqsan qarar diya aur kaha ke ye dono artist Pakistan ke liye ek safeer ki hesiyat rakhte hai. Unho ne tamam shobon mein dono mulkon ke darmiyan mazboot talluqat qaim karne ki zaroorat par zoor diya.

Shabnam 12 saal bad Pakistan aai hai aur Karachi ki khobsoorti dekh kar heraan reh gai, un ka kehna tha ke ye shehar pehle se bohat zaida khoobsurat ho gaya hai aur ise dekh kar aesa lagta hai jese mein kisi maghrabi mulk mein aai hoon. Adakara Shabnam ne maazi ke mashoor comedian Lehri se bhi un ke ghar jaa kar mulaqat ki aur un ki kheriyat daryaft ki. Unho ne apne tassurat beyan karte hue kaha ke Lehri ko dekh kar mujhe wo sunehri daur yaad a gaya, jo hum ne filmi dunya mein ek sath guzara tha. Mujhe un se milne ki bohat khushi hai. Wo mere mukhlis dost hai aur un ki jald sehatyabi ke liye dua-go hoon. Lahore mein qayam ke dauran wo kae filmi shakhsiyat se mili aur purani yadon ko taza kiya. Is mauqe par unho ne kaha ke wo apne kae doston aur saathiyon ko miss kar rahi hai jo is dunya mein nahi rahe. Jin mein hidayatkaar Javed Faazil, hidayatkaar Parvez Malik, adakar Mohammed Ali, waghera qabil-e-zikr hai.

Pakistan mein apne qayam ke dauran walehana istaqbaal par adakara Shabnam aur Robin Ghosh ne Hukumat-e-Pakistan, PTV aur awaam ka shukriya adaa kiya aur kaha ke wo yahan se be-panah mohabbatein wapis le kar ja rahe hai. Adakara Shabnam ne Pakistani filmi sanat ki zabon-haali par afsoos ka karte hue is umeed ka izhaar kiya ke bohat jald film industry dobara apne peyron par khari ho jaegi. Isse pehle Lahore ke Allama Iqbal International Airport par apni aamad ke bad sahafiyon se baten karte hue Shabnam ne kaha ke wo 12 saal bad Lahore aai hai aur is shehar se unki gehri yadein wabasta hai.

Bangladeshi cricket team ke Pakistan na aane par ek sawal ka jawab dete hue Shabnam ne kaha ke ye adalat ka faisla hai is liye wo is par koi tabsara karna nahi chahti lekin un ke khayal mein Bangladesh ki cricket team ko Pakistan aana chahiye tha. Aik aur sawal ke jawab mein Shabnam ne kaha ke wo yaqeenan kisi Pakistani film mein kaam karna chahengi, ba-shart ye ke ye offer kisi ache Producer ya Director ki tarf se ho. Phir unho ne sab ko apni wapsi par jate hue kher bad kiya aur ek bohat achi aur khushgawar mulaqat aur yaadon ke sath sab ko alvidah kek ke rawana ho gai.

 

 

More Links

 

Copy Right 2012-2015 www.Meriduniya11.com