Header
Home> Articles

 

 

 

 

Mother In Law Daughter In Law Relationship

( Saas Bahu Ka Rishta)

Competition between mother and his son’s wife. Why 2 women are so different??? Our story showing you the relationship between mother in law and daughter in law. We always take negative think about daughter in law and mother in law, because it is natural instinct of all humans. But we can easily make this relationship more pleasant with mutual understanding from both sides. In this page you will read Saas Bahu Ka Rishta ( Mother In Law Daughter In Law Relationship) Article In Urdu and Roman .

Saas Bahu Ka Rishta Image

Saas Bahu Ka Rishta

Rishte banana itna aasaan jaise mitti par mitti se likhna, unhe qaim rakhna itna mushkil jaise pani par pani se likhna. Rishton ki qadar karna seekhein. Kisi ki beti ko apne ghar late waqt sochna chahiye ke na sirf ye hamari Bahu hai, bal ke hamare khandan ki izzat-o-raunaq bhi isi ke dam se hai. Kal ko hamari beti bhi kisi ke ghar ki bahu banegi to wo us ghar ki izzat hogi. Beshak aane wali bahu se dher sari tawaqquaat aur umeeden wabasta kar li jati hain, lekin jab use beti ki tarha samjha jaega, tab he ghar sukoon ka gehwara ban sakega. Nae lagae darakht aur purane phal daar darakht mein kitna farq hota hai, kya yeh kisi Saas ne socha ??? isi sawal par main app ko aik kahani sunati hoon.

Dr. Sahab kheriyat to hai ? mera jawan jahan beta to theek hai na ? aakhir hua kya hai us ko ? udherh umar khatoon ne Dr. Sahab jo emergency room se bahar aae the, ek sath itne sare sawal poch dale. “ Dr. Sahab ne jawab dete hue kaha, ji wo thek hain, bas aap log dua karen ” aur phir yeh kehte hue wo aas pas khare rishtedaron se baat karne lage. Main qareeb he khari thi. Waldah ko saans ka shadid masla tha, jis ki wajah se wo emergency mein dakhil thin. Bahar patient ke rishtedaron ka khob rush laga hua tha. Hospital ka guard bar bar sab ko bahar jane ko bol rahe tha. “ Aunty kheriyat to hai, kaun admit hai ? ” main ne us udherh umar khatoon se pocha. “ Bas beta kya bataon, Maa hoon, beta mera admit hai..... kitne armanon se abhi 3 maah pehle us ki shadi ki thi. Jab se yeh bahu mere ghar mein aai hai, mera ghar to jaise jahannum ban gaya hai. Dekho kaise miskeen bani rou rahi hai, kambakht kahin ki...” qareeb he aik nae shadi shuda larki bhi khari thi. Jis ki aankhon se musalsal aansoo beh rahe the. Maine pocha ke aunty ap ka beta bemar kaise ho gaya ?

Udher Khatoon pehle to meri taraf gusse se dekhne lagi, phir unho ne bataya, ke are beta wohi rozana ke larhai jhagrey, phir is larki ki narazgiyan, mera beta din bhar ka thaka hara sham ko ghar ata, to biwi ka larhai jhagra. Ab kal sham ko jab ghar aya to use halka sa bhukhar bhi tha. Ghar mein dakhil hote he Bahu ne us ke kaan bharna shuru kar diye. Main bhi aakhir kyun chup rehti. Maa hoon main us ki, kya is din ke liye paal pos kar barha kiya tha ke biwi kaan bharti rahe. Parha likha kar is liye shadi ki thi kya apne bete ki, ke bahu aate he humen side par kar den aur bete ke sath sath sari tankhuwaa par bhi haq jama le. Bas beta bukhar tez hua aur mera bacha behosh ho gaya. Pata nahi Dr. Sahab kuch sahi tarha bata nahi rahe, shayad dimagh mein khoon jam gaya hai, is liye hosh nahi aa raha. Aunty ne mujh se kaha ke beta dua karna mera beta thek ho jae. Us ke bad to main is manhoos larki ko apne ghar mein dakhil bhi nahi hone dongi, aunty ne apni bahu ki taraf dekhte hue kaha.

Qareeb he khari nae naweli dulhan jis ke hathon ki mehndi ka rang bhi nahi utra tha abhi. Laal choriyan pehne hue aankhon se aansoo saaf kiye ja rahi thi. Khauf aur dehshat se us ladki ka bura haal tha. Educated dikhai de rahi thi. Shayad Dr. Ki baton ko samajh chuki thi. Uff..... kash aesa na ho. ALLAH PAK is ka suhag qaiym rakhe. Be ikhteyaar mere mou se yeh alfaz nikle.

Chand si dulhan apne ghar lane ka shauq kis Maa ko nahi hota. Lakhon rupey paise to kapron aur zewar ki kharidari par he kharch ho jate hain. Khushiyon bhari rasoomat se dulhan ko ghar laya jata hai. Magar yeh kya..... dosre din se he us ki aik aik harkat par gehri nazar. Mou se nikle hue har aik hurf ko tolna aur har tarha se apne maeyne dena. Pehle to tanziya jumley aur phir agar “ Chand si Dulhan ” bhi mou zor nikle to phir dekho aap, kya hota hai. Wohi ghar jo chand din pehle khushiyon aur raunaqon ka markaz tha. Jahannum ka jaisa sama pesh kar raha hota hai.

Soorat-e-haal par ghor kiya jae to sara qusoor na saas ka hota hai aur na he bahu ka. Kehte hai ke taali dono hath se bajti hai. Bas wohi baat hai. Shuru shuru mein larkiyon ko susraal mein phonk phonk kar qadam rakhna chahiye. Aate he shohar aur us ki tankhuwa par haq jamana sahi nahi. Aesi harkaton se na sirf ladki susral walon ki nazron mein gir jati hai, bal ke shohar ke dil mein bhi us ka maqam dhundla ho jata hai. Agar shohar se waqai mohabbat hai aur ap use khud ka banana chahti hain, to pehle us ke apno se mohabbat aur aehteraam se pesh aae. Yaad rahe, shadi ke bad bete ke mou se mikli hui har baat khuwa wo Maa se kare ya bhai, behno se, zimedaar biwi ko he theraya jata hai ke “ yeh nahi yeh to is ki biwi bol rahi hai ” ya “ aa gai na biwi ki zuban mou mein ”. lehaza nae naweli dulhan sirf apne andar sabr-o-bardasht ka maadda peyda karen, bal ke shohar ko bhi is baat ka aehsaas dilaen ke shadi ke bad ab aap in baton ka khayal rakhen, jin ka aehsaas ap ko pehle nahi tha. Maslan waldain ka aehteraam, behan bhaiyon ka khayal, ab ap ko pehle se ziyada rakhna ho ga. Kyun ke ab aap aik zimedaar fard hain. Bas yehi sabr-o-bardasht, rishton ka aehteraam aur muamla fehmi aap ke shohar ko aap ka umar bhar ka aik acha hamesha sath dene wala sathi aur ap ke ghar ko jannat bana degi.

Dosri janib saas aur susraal ke deegar afraad ko bhi kisi ki beti ko apne ghar late waqt sochna chahiye, ke na yeh sirf hamari bahu hai, bal ke hamare khandan bhar ki izzat aur raunaq bhi isi ke dam se hai. Kal tak jab beta din bhar ka thaka hara kaam se ghar ata hai to us ke aaram-o-mohabbat aur khane peene ka khayal rakha jata. Maa he nahi, behne bhi dorhi dorhi aage piche phirti, koi mutanaza baat ya masley masaiyl thake hare bete ke samne nahi kiye jate the aur shadi ke bad dosre din se he Maa aur Behne bhi har kaam se door bhagne lagti hain. aakhir biwi kis liye lae hain, goya aan ki aan mein sara naqsha badal jata hai aur Maa behne apne bete, bhai ko khud he apne rawaiyyon se door karti chali jati hain. Aik Maa bete ki khushiyon ki khatir he to us ki shadi karti hai, bahu bete ka khush rehna, hansi mazaq karna, ghomna phirna, yeh sab khule dil-o-dimagh se qabool karen. Un ki khushi mein saas waise he khush ho, jaise apne beti aur damad ko dekh kar sukh ka saans leti hai.

Beti ko nae kapre aur zewar dekh kar mutmaiyn ho jati hai, ke shukar hai damad ne khush rakha hua hai. Bas yehi tazad aur dohrey meyar khatam kar den. Beti ho ya beta us ki khushiyon mein khush rahen.agar aane wali dulhan na samjhi ka sabot bhi de, to khud muamley ko dekhte hue use samjhaya jae, barhe pan ka muzahira kiya jae. Khandan ke har chote barhe ko apne ghar ke muamlaat mein dakhal dene ka mauqa na den. Bahu ka dil se khayal rakhen. Wo khud ap ki izzat karegi. Har aae gae ke aage shikayaton ki potli khol kar na beth jaen. Bohat si batein nazar andaaz kar dene mein he bhalai hoti hai. Rishton ki qadar, aik dosre ki khuwahishat aur jazbaat ka aehteram, hifz-e-muratib ka aehsaas rakhna, choto se mushfaqana rawaiyya, barhon ki izzat, eisaar-o-qurbani aur husn-e-sulook. Bas yeh he to wo raaz hain, jo bahu ko beti se barh kar pyar aur saas ko Maa jaisa qabil-e-aehteraam bana kar gharon ko khushiyon ka gehwara bana dete hain.

Abida Perveen Alhaj Muhammad Siddiqui Ismail Exersice Tips

 

 

  • More Links

Retirement Ki Tayari

Husn e Akhlaq

Hakeem Saeed

Importance of Water

Jahez Ki Lanat

Purani Film

Gold Aurat Ki Kamzori

Mazloom Aurat

Nikah In Islam

 

Copy Right 2012-2013 www.Meriduniya11.com Contact Us