Header
Home>>Article

 

 

Flood In Pakistan

Flood (Selab) disaster had affected in all over Pakistan. Pakistan and its all Province faced the flood disaster cause of heavy rainfall of Monsoon season. It is very dangerous for those peoples who live in affected areas. Animals also affected because of flood disaster ( Selab ki tabahi). Many peoples and animals died in disaster. Flood water destructed many houses in disaster areas. Drainage and sewerage system were blocked cause of fill the flood water in the areas. Many people faced the skin infections, asthma problem and different types of illness cause of flood disaster. More than 15 lac people were affected by the heavy rainfall of Monsoon season across Pakistan. Almost 350 helping camps established in all over Pakistan for the affected peoples. In this page you can see the information about Flood In Pakistan In Urdu (Pakistan Me Selab).

Flood In Pakistan In Urdu

Pakistan Me Selab

“ CHAARO TARAF SAMANDAR CHALKE,

PEENE KO PAR AIK BOOND NAHI…

Flood In Pakistan Image

Selab (Flood) ke dino mein sab se ziyada takleefdey baat pine ke saaf pani ki adam dastiyabi hoti hai. Har taraf pani hota hai, magar wo pani rehmat ke bajae zehmat ban chuka hota hai. Insane ke ilawa palto janwaron ko bhi pani chahiye. Mutasireen ke baqaul “ Khoraak ke bina waqt cut jata hai magar pani ke bina zindagi azaab ban jati haai. Keecher, badbo, hubs aur bebasi ke aalam mein pani wo wahid shey hoti hai, jo saans ki dori ko tootne se bachati hai. Bache jab sookhe honton se pani mangte hain to…??? Karbala ki yaad taza hone lagti hai…”

Pakistan main aaj kal phir Selab ki lapeyt mein hai. Lakhon log be ghar ho kar khule aasman tale zindagi guzarne par aik baar phir majboor ho chuke hain. Hukmarana apni bisaat ke mutabiq imdadi kamon ke zariye Selab zadgan ki diljoi mein masroof hain, lekin September mein mazeed barishon ki peshgoi ne yeh sochne par majbor kar diya hai ke Selab se mutasira lakhon be ghar shehriyon ki takaleef mein jab mazeed izafa (ALLAH PAK ka karam ho ke aesa na ho) ho ga, to is ko kam karne ke liye humen kya karna ho ga ??? bohat kuch kaha ja sakta hai. Bohat se aise kaam jin ko log aaj bhi karna chahte hain wo is liye nahi ho pate ke bad unwani aur bad niyati ne har jagah panje garhe hue hain. Pakistan mein jab bhi Selab aata hai. Hukomati satah par Prime Minister ke naam se aik fund qaiym ho jata hai. Phir tamam banks ke zariye atiyat wasooli ka silsila shuru ho jata hai, lekin aaj tak ilm nahi hua ke har baar yeh atiyat kahan kharch hote hain ??? mustahiq afraad ko milte hai b ya nahi ???

Tareekh gawah hai hukomati satah par tamam tar iqdamaat aur imdadi mansobo ken ad hamesha Selab zadgan apni madad aap ke tehat he zindagi ke dharey mein dobara wapis aae. Yehi hamare aehan ka aik aesa karhwa sach hai, jis ko hazam karna mushkil zaroor hai magar is ke bagher chara bhi nahi hai. Is zaman mein aik misaal darj hai ke Musharraf Government thin, Selab aa chuka tha. Mulk ke andar mukhaiyyar hazrat ne dil khol kar atiyat diye. Gher mumalik ne bhi har satah par imdaad ki. Saudi Arabia ne Selab zadgan ke liye qeemti khajoron ka tohfa diya ta ke chand hafton bad aane wale Ramadan ke dino mein Selab zadgan roza iftar kar saken. Selab ke bad Ramadan ul Mubarak aa gaya. Karachi mein aik aala hukomati auhdeydaar ne Iftar party ka aehtemam kiya, wahan Saudi safeer bhi madoo the. Iftari ke liye jab Saudi khajoren table par rakhi gai to Saudi safer ne wo khajoren pehchan li, jo atiya ki gait hi. Pehle to wo Iftari se uth kar jane lage lekin phir un ko yeh bata kar rok liya gaya, “ ke khajoren bohat ziyada thin, is liye taqseem ke bad jo bach gai, wo arbaab ikhteyar ne aapas mein taqseem kar li…” kehte hain Saudi safeer sirf muskura kar reh gae aur apne sath aane wale aik dosre muazziz mehman se sirf yeh kaha, “ Maine pehli bar atiyat bachte aur aapas mein bathte hue dekhen hain…”

Pakistan mein Selab (flood) aur monsoon barishon ki sortehaal batadreej shiddat ikhteyar karti ja rahi hai aur barishon aur Selab se August ke aakhir tak 1.5 million Pakistani mutassir ho chuke hain. National Disaster management authority ( NDMA ) ke fresh aedad o shumar ke mutabiq guzishta maah ke dauran shadid barishon aur flood ke baiys kam az kam 178 afraad halaak hue hain. Rawan Monsoon season ke dauran peyda hone wali Selabi surtehal aur barishon ki wajah se 855 afraad zakhmi bhi hue. Hukkam ke mutabiq Pakistan bhar ke 5 thousand 615 dehat mutassir hain, jab ke 20 thousand se zaiyd ghar mukammal taur par tabah ho chuke hain. Taqriban 10 lakh mutasira afraad ke bad sortehal tezi ke sath shiddat ikhteyar karti ja rahi hai. Hukkam ke mutabiq mulk bhar mein mutasira afraad ki madad ke liye 350 imdadi camp qaiym kiye gae hain. In mein se ziyada tar wasti Punjab, Junobi Sindh aur Junob Maghrib Sobaa e Baluchistan mein qaiym kiye gae hain. NDMA ke mutabiq aaiynda maah bhi shadid barishon ki tawaqqa ki ja rahi hai aur is silsile mein in ki tayyariyan mukammal hain. Prime Minister Nawaz Sharif ne bhi charo province ki intezamiya ko hidayat jari karte hue kaha hai ke wo mumkina Selab ke khatraat se nimatne ke liye apne intezamat mukammal rakhen. Agar September ke dauran shadid barishen hoti hain to Pakistan ka wasee tar raqba zeyr e aab aane ka khadsha hai aur us se nimatna muntakhib hukomat ke liye aasan nahi ho ga. Pakistan ko is waqt sangeen mali bohran ka bhi saamna hai aur is se nikalne ke liye haal he mein ben ul aqwami maliyati idarey IMF se qarz liya gaya tha. Selab ki sortehal sangeen tar hone se na sirf mehngai mein izafa ho jaega, bal ke wasee peymane par khari faslon ko bhi nuqsan pohnchega.

Pakistan guzishta 3 barson se Selabon aur monsoon ki shadid barishon ka saamna karta chala aa raha hai aur maqami media ki taraf se hukomati idaron ko mausmi khatraat se munasib taur par nimatne ki wajah se tanqeed ka nishana banaya ja raha hai. Magar natija wohi Dhaak ke 3 paat rehta hai. 2010 mein Pakistan ki tarikh ka sab se bad tareen Selab aya tha. Jis ke natijey mein kam az kam1800 afraad halaak aur 21 million afraad mutassir hue the aur is flood se barhe peymane par tabahi hui thi. Ab haliya shadid barishon aur Selab ke baiys 178 afraas halaak jab ke mutasireen ki tadad 15 lakh se tajawuz kar gai hai. Fresh aedad o shumar ke mutabiq Pakistan ke Province Punjab mein 64, Khyber Pakhtunkhuwa mein 24, Sindh mein 35, Balochistam mein 18, qabaiyli ilaqajaat mein 12 aur Pakistan e zeyr e intezam Kashmir mein ab tak 25 afraad halaak hue hain. Mulk mein haliya barishon aur flood mein sab se ziyada nuqsan Punjab mein hua hai. Jab ke nuqsan ke lihaz se Sindh dosre No.par hai. Barishon aur Selab se 855 afraad zakhmi hue hain. Zakhmi hone walon mein 790 afraad Punjab se hain, is ke ilawa 7 lakh 18 thousand se zaiyd mutasireen ka talluq bhi Punjab se hai. Ab tak tabah hone wale dehaton ki tadad 5615 batai gai hai. Sab se ziyada mutasir hone wale dehat province Sindh mein hain. Jin ki tadad 3341 hai. Punjab ke 1917, Baluchistan ke 342 aur Khyber Pakhtunkhuwa ke 15 dehat mutassir ho chuke hain. Sarkari aedad o shumar ke mutabiq mulk bhar mein barishon aur Selab se 20,312 makanaat mukammal taur par tabah, jab ke 28,017 makanaat juzwi taur par tabah hue hain.

Punjab mein August ke end tak 55 afraad halaak aur 790 zakhmi hue the, jab ke Selab se 1741 dehaat mukammal taur par tabah ho chuke the. 555030 acre par khari faslein tabah ho gai thin aur mutasira afraad ki tadad 634322 record hui thi. Barishon aur Selab se khari faslein bhi tabah hui hain. Punjab mein 760353 acre, Sindh mein 203,593 acre, Baluchistan mein 63969 aur Khyber Pakhtunkhuwa main 4,279 acre irazi par faslein tabah ho gai hain. Haliya barishon se maweshiyon ko nuqsan bhi pohncha aur is silsile mein ziyada nuqsan Baluchistan mein hua jahan 4,555 maweshi halaak hue. Mutasir afraad ki madad ke liye mulk ke mukhtalif hisson mein 323 imdadi camp qaiym kiye gae hain. In mein 210 camp Punjab, Sindh mein 109 aur Baluchistan mein 4 camp qaiym kiye gae hain.

Yaad rahe ke Pakistan mein 2010 mein aane wale Selab (flood) ke dauran 8.5 arab rupey se ziyada ka nuqsan hua tha aur senkron afraad halaak. Is ke ilawa 2 crore se ziyada afraad ko ghizaai qillat ka bhi saamna karna parha tha. Haliya monsoon ki barishon se dariyaon aur naddi nalon mein Selabi sortehal paida hone se ab bhi mukhtalif rivers mein darmiyane aur oonche darjey ka Selab hai. Selab se mutasira baaz areas mein skin ki bemari phelne ke ilawa logon ko saans lene mein takleef ki shikayat barhne ki information hai. Tahum health department ke mutabiq sortehaal qaboo mein hai aur in bemariyon ne filhal wabai shakal ikhteyar nahi ki…

 

 

 

More Links

 

Copy Right 2012-2014 www.Meriduniya11.com